الرئيسية » صور و مناسبات Photos and occasions » “جانى أبويا فى المنام” للشاعر د.خليفة الخطيب

“جانى أبويا فى المنام” للشاعر د.خليفة الخطيب

جانى ابويا فى المنام
اتفرد جنبى ونام
كان واحشنى ف المشورة
كان واحشنى ف الكلام
مد إيده خدنى جنبه
خدنى حضن بتاع زمان
قالى مالك ، مش طبيعتك
والقرايب ، والجيران
خد لى حذرك ، اوعى منهم
قمت باكى ، للهوان
وانبرى منى الكلام
كل حاجة قلتلها له
واستمع ليا تمام
دا ابويا كان سامعنى
ذلك الرجل الهمام
صاحب الرأى المسدد
والمشورة فى الضرورة
كان حقيقى له نظام !
استمع لى ك الحقيقة

وانطلق من اللسان
قلتله يابا اختلفنا
فيه الحلال وفيه والحرام
اللى كنت تخاف عليهم
اللى فضلك كان ساقيهم
اللى عيشك كان غطاهم
اللى خيرك كان عميهم
ساقوا فيها باحتدام
قالوا فينا كلام خسيس
وزوروا كل الكلام
اللى كانوا مايساووش
تموا يفتوا فى الظلام
ليل طويل وليل قصير
والنهار زيه تمام
عندهم سوء التصرف
كاعتداله بالتمام
حتى حال جيرانا أصبح
متناقض بانتظام
تسمعه بيقول حقيقة
زى كذبه والسلام
والأقارب كالعقارب
سمهم قاتل قوام
غيرة ، حقد ، نفوس ضعيفة
تحسد الموت الزؤام
ياابى اهنأ قريرا
فى جنان لك مقام
أما احنا فلك دعينا
يسكنك دار السلام
نلتقى فيها جميعا

زمرة دون انقسام
رد ابويا قال لى يابنى
خلى بالك دول وحوش
حظهم فيها مقدر
عقلهم مابيفهموش
قول ، خطابة ، درس دين
دول حياتهم ف الرتوش
للتوافه والصغائر
دنيا أية مايعرفوش
دنيا زايلة باللى فيها
هما ليه ماينتهوش
بكرة يعرف كل حاقد
إن حقده ماينفعوش
والندم ساعتها يبقى
له مطية مايركبوش
سيبو يابنى وقولوا بكره
للمظالم والكروش
فيه ميزان وفيه عدالة
تبقوا قولوا : مانروحوش
تبقوا قولوا مانموتوش
ونترك الدنيا الغبية
والوجاهة المشترية
والملايكة مترحموش
يابنى قوله فيه ميزان
واختلاف زمان مكان
والحقوق ليها ضمان
اما نار اما جنان
يرجع الحق ال صحابه

بالكمال وبالتمام
يومها يفلس كل ظالم
والعدالة مترحموش
يحسبوها دايما ليهم
هم ليه مافكروش
هم يعنى ما يموتوش
وع السراط مايعرضوش
أنا يابنى منتظرهم
لو شطارة مايوصلوش
وع الحساب ما يوردوش
و ع السراط مايركبوش
اصلهم ساقوا السفالة
ظنهم ما بيشوفوش
نقطة الصفر البداية
عندها مايعذروش
والعدالة ماتسيبوش
يومها تنكشف الوشوس
وليها تانى مايرجعوش
والندم ماينفعوش
ليتهم عندى ماجوش
فى القبور مايدفنوش
وللكفن مايلبسوش
وللاسف مايعرفوش !
هو ايه حسن الختام ؟
غير تكون ابن الكرام !
وانتفض فجأة وقام
وانتهى بينا المقام

بارتفاع صوت الإمام
بالمساجد ياكرام
يعلن الفجر التمام
قمت نلحق بالجماعة
والصلاة والسلام

“Janny father in a dream” by the poet Dr. Khalifa Al-Khatib

عن admin

اضف رد

لن يتم نشر البريد الإلكتروني . الحقول المطلوبة مشار لها بـ *

*